Oppe reunie van ‘t 33-jaorig besjtaon van c.v. de Kwekkerte in ’t naojaor van 1981 kwome de aad-prinse John I (John Clumpkens) en Pierre 1e (Pierre Eggels) toet de konkluzie det eine aaftraejende prins meistal nao zien aaftraeje in ein deep gaat veel. Same mit de prins van det jaor Ton II (Ton Sonnemans) höbbe ze toen mit z’n drieje de köp biejein gesjtaoke óm ‘ns te kieke waat dao aan te doon is. Ouch wólle ze waal ‘ns óngerzeuke of d’r ónger de aad-prinse interesse is óm door ’t jaor haer zo aaf en toe ‘ns biejein te kómme. Dus waerde op 22 oktober 1981 de eerste vergadering van de Aad-prinse oetgerope en waerde drek al heel get besjloete genaome.

Zo waerde aafgesjpraoke det alle aad-prinse (dus vanaaf 1949) de aad-prinse medalie kriege, de jóngste aad prins eder jaor de aaftraejende prins zal benumme toet “Ridder in de orde van dien veurgengers en mitbeheerder vanne Sjpèkkerkoele en de Haok”; de aad-prinse èlk jaor ‘n prinsemöts koupe veur de nuje prins, zodet de aaftraejende prins zien eige möts kèn haje; ouch de optoch door häör geregeld waert; en óm toch ein bietje geldj in kas te kriege, jaorliks ein vriejwillige biejdrage waert gevraog aan de aad-prins óm ónger angere de nuuj prinsemöts te kènne koupe. ’T eerste “besjtuur” besjtóng oet veurzitter Ton II Sonnemans, sikretares (kretser) Pierre I Eggels en penningmeister (sentefoekser) John I Clumpkens.

Ouch waerde de zorg veur de Kwekkert oppe hook vanne Kèrkwaeg enne Heikamp door de Aad prinse opgepak. Dit keremiekke  kunswerk waar door Aad prins Sef II van Buggenum (Fetje van Ingele) verkrege biej St. Joris door ’t levere van allerhandje taegeprestasies en ouch door Sef toet ZAOBES (beteikent lobbes of löbbes) ómgeduip. Dit monement det biej ‘t 3 x 11 jaorig jubelejum in ’t veurjaor van 1981 is geplaats is mede toet sjtandj gekómme door ónger angere, toen jubelejumprins, Ton II Sonnemans en John I Clumpkens in samewèrking mit de, toen nag, gemeinte Zjwame en cv de Kwekkerte.

In dec. 1982 waert besjlaote det de Aad-prinse biej alle offisjele optraejes eine sjlupjas en häör prinsemöts en häör Aadprinsemedalie drage en waert d’r ouch besjlaote óm ‘t regele van de jeugvastelaovindj vanaaf vastelaovindj 1983 van de toenmalige organizasie euver te numme.

In maart 1984 is Tila Hendrickx, de oetbaatster van ’t Kwekkertepelies, benump toet besjermvrouwe vanne Aad-Prinse en waert Aad-prins Edmund I Schreurs sikretares. Ouch waert in dees vergadering gesjtraeveld euver ’t get meer regele van ‘t prinsinwieje op zunjig nao de prinsebal. ‘T “prinsinwieje” is min of meer óntsjtange  doordet Prins Edmund I (1983) sunjes nao de rippetiesie vanne hermenie (en dus daags nao de Prinsebal) inne kefee bleef hange en dao door zien vrouw van middigaete waerde veurzeen. Wodoor d’r ’t nag ein tiedje vól kós haje. Dit is oetgegreujd toet ein tradisie die toet op de daag van vandaag nag plaatsvindj. De lètste jaore is ’t, door de nuje prins, laote oetveure van allerlei kolderieke opdrachte ouch oetgegreujd toet ein tradisie. Inmiddels is d’r zelfs idder jaor ein kemissie, de Prins Inwiej Kemissie (PIK). Boete ’t tradisjonele aete vanne nuje prins waert d’r ouch nag ech ingewiejd door Pater Gerardus in de persoon van Ger Winands. Vanne Aad prinse krieg de nuje prins tradisjoneel ein fles “Kwekkerte Blood”. Oppe prinseresepsie waert d’r ouch nag ‘ns veurzeen van ein fles Zaobes Zabbel, eine krachtige wien dae waert getrokke oet ’t bèste moeraswater vanne sjpèkkerkoele enne Haok.

Vanaaf de vastelaovindj 1986 hoofde de Aad-prinse geine jeugprinsewage meer zelf te boewe, want ze krege d’r jaorliks eine gratis en veur nieks via Math Clumpkens, toendertied direkteur biej de pepierfebriek in Leeve.

Vanaaf 1989 kriege de Aad-prinse zelfs via Math ein paar prinsewages veur de jeug gesjónke. Door ’t verhure van dees wages kóste de Aad prinse geldj verdene waat weer neudig waas óm de wages te óngerhaje en aaf en toe eine angere aan te sjaffe.

In nov. 1991 waert Aad-prins Bert III Hendrikx de nuje sikretares en jaors drop, 1992, aad-prins Jan X Bol de nuje penningmeister.

Meert 1992 waert biej de Zaobes ’t bördje “4 x 11 Plein “en ein zitbank ónthuld, beide es kedo vanne aad-prinse veur ‘t 44-jaorig jubelejum vanne Kwekkerte.

14 November 1992 is d’r ’t eerste gezamelikke oetsjtepke, 11 jaor nao de eerste biejeinkóms. Mit ein grote bös waert de Hertog Jan Broeweriej in Aarse bezóch.

7 Jannewari 1994 waert Pierre I Eggels de nuje veurzitter. Op 16 jannewari 1996 waere de eerste offisjele sjtatute opgemaak biej de notaris en dao in  kriege de aad prinse de naam van : rechtspersoonlijkheid bezittende vereniging ”aad prinse c.v. de Kwekkerte”.

Op 18 december 1997 waert de vergadering van de aad-prinse veur de eerste keer gehaje in ‘t “sjtraevelhok” det eers de hoeskamer woor van de femielie Hendrickx. In dees vergadering nump Jan X Bol veur 2 jaor ’t veurzittersjap euver, ómdet Pierre I door sjtudie efkes get minder tied haet.

Begin 2003 kriege de Kwekkerte ‘n permanente verleechting op ‘t 4 x 11 Plein es kado vanne aad-prinse biej häör 55-jaorig jubelejum.

Op de Bóntje Aovindj van 2005 traeje de aad-prinse veur de eerste keer op. Op bekènde meziek waere ’n 7-tal liedjes gezónge mit eige tekste, toe ouch väöl gemaak door Huub Custers. Ouch waert dit jaor door ein aantal aad-prinse veur de Kuulköpkespool ein sjitterend nuuj dekaor gemaak ónger begeleijing van Angela van aad-prins Jos I Sanders en gaon v’r dao veur ’t eers wèrke mit konsumpsiepenninge. Op de vergadering van 20 april 2005 waert besjlaote det d’r ein nuuj óngersjeijing kump: de vètlaere medalie. Dees kan oetgereik waere aan aad-prinse die get ekstraas gedaon höbbe veur de Aad Prinse mer ouch tiedes resepsies of get van dae aard. Op de desembervergadering van 2005 nump aad-prins Robert I Claessen ’t sikretariaat euver van Bert III.

Begin 2007 waert eindelik ’n gooj sjtalling gevónje biej de femielie Vrenken in Heitse veur oze in ’t jaor daoveur gans opgeknapde jeugprinsewage. Vanaaf 2022 is d’r helaas gèn sjtalling meer tekriege veur de wage en sjteit d’r boete….. In 2026 kwoom hiej gelökkig verangering in. De aje wage waerde verkoch en dao kwoom eine nuje. Oppe Ruiver waerde ouch ein sjtalling gevónje veur de nuje wage vanne jeug.

Op de novembervergadering van 2007 treujt Pierre I Eggels aaf es veurzitter. Toet d’r eine nuje opvolger is gevónje, nump Jan Bol ’t veurzittersjap veurluipig waor.

Op 11 desember 2008 waert aad-prins Ron I Clumpkens benump es nuje veurzitter. Biej de lètste aanpassing van dit versjlaag in 2025 is d’r det nag sjteeds.

Biej ‘t 4x11 jubelejum vanne Kuulköpkes in 2009 is door de Aad Prinse in samewèrking mit de CV ein nuuj kunswerk, de KUULKOP, (gemaak door Joop Crompvoets) geplaats naeve de Zaobes op ‘t 4x11-plein en aangebaoje aan de jeug.

Op 29 april 2010 waert aad-prins Edmund I Schreurs de nuje penningmeister. Det blief d’r toet en mit 2017. Door ’t aaftraeje van Robert I is Edmund I vanaaf 2018 weer sikretares-kretser van de Aad Prinse en nump Roel I Peeters ’t sjtekske euver es nuje penningmeister-sentefoekser.

Biej ‘t 3x11 jaorig besjtaon vanne Aad prinse waert de sjlupjas veurzeen van ein nuuj Aadprinselogo det door Ron I Clumpkens is óntworpe en gerealizeerd.

Ter gelaegeheid van ‘t 77 jaorig jubelejum (2025) vanne Kwekkerte waert door de Aad prinse ’t monement op ‘t 4x11 plein opgeknap en gemodernizeerd. De vastelaovesgroep “van ’t Padje” duit dao nag ein sjöpke baovenop door op ‘t 4x11 plein ein “geroes iezere” herdinkingsplaat te plaatse mit dao-in alle name vanne aafgeloupe 77 jaor in gebrandj. Dit waas taeves biej gelaeg van ‘t 4x11-jaorig jubelejum vanne Aad Prinse in 2026.

2025 woor ouch ’t jaor wo de Prins, Dominique I es eerste, aaftreujt oppe dinsdigaovindj. In 2026 (feitelik oppe Prinsebal in 2027) verwelkómme de Aad Prinse. veur ’t eers ein Aad Prinses in de persoon van Evelien I Evers. 2025 is taeves ’t jaor wo-in Vors en Aad Prins Björn I aaftreujt es Vors. Ómdet d’r nag geine vervanger woor, haet d’r op sjpesiaal verzeuk van Prinses Evelien I in 2026 toch nog veur ’n jaor de vaere oppe möts gehaje.