Vastelaovindj 2005 löp op zien inj en dus hèlt ’t veur ein aantal leje van de kuulköpkes op.
Die realizere zich det ze neet meer es lid van ein vereniging mit kènne doon aan de Boekoelse vastelaovindj. Rick Ritzen en Dominique Clumpkens zoge in Azerao det dao ouch ein klub waas opgerich. Waat dao kan mot hiej ouch kènne.

Chris van Deur en Kim Vervoort wore ouch drek te porre, mer dao wore d’r ouch diej ’t duuster inzoge of dit waal ging lökke.

Biej Jean en Claar in kefee de Hoeskamer waerde ze mit aope erm óntvange.
’T doel: es lid van ein verenging vastlaovindj viere oppe Boekoel veur de jeug die te aad is veur biej de kuulköpk en te jónk veur de kwekkerte.

Gein geldj, gein plan, gein idee, mer geweun begós. Petra Porteous en Bernadette Groswardt die al dökker aktiviteite haje georganiseerd veur deze laeftiedsgroep waerde om hulp gevraog en al sjnel kwaam de eerste € 250,- subsidie van de gemeinde binne.

De jóng men en vrouwluuj sjpaarde zelf wiejer. Waem te zunig waas kreeg det te heure.
Noe nog eine naam… Paul Heijnen kwaam mit ’t verlossende idee en “De Hoeskwakers” wore gebaore. Dominique maakde ein logo Kim boewde de website en De Hoeskwakers wore d’r klaor veur.

Jean en Claar haje belaof óm sjörtjes te koupe óm mit te doon aan de 6-kamp van de Kwekkerte. Zie wore ’t d’r drek mit èns es veur det geldj zoje gebroeke veur de pekskes van de Hoeskwakers.

Op nao Maaseik, ’t mekka van de vastelaovespekskes, mer waat ein desepsie wie bleek det ein sjuutje € 90,- mós koste, det zooj nooit get kènne waere .
In ein achteraaf sjträötje vónje veur nog eine prinsekeep en einne sjteek, biejein veur € 190,- Dët mós ‘t zin! Sjuutjes vónje veur biej de póppedokter € 12,50 per sjtök, waat idderein zelf mós betale. Verder ein jaorlikse kónterbusie van € 20,- en det waas zoget de heel bookhajing.
‘n prinskemissie waerde in ’t laeve gerope en veur naome ós veur óm emés te keze dae nog neet biej de Kuulköpkes prins waas gewaes. Prinsesse wóre in dae tied nog neet aan de orde.  

24 febrewarie waas ’t zo wiet: In ’t zaelke van Kefee de Hoeskamer kwoom prins Rick I Ritzen oet ’n dook gesjprónge ’t waas zo drök det d’r nauwliks plaats woor óm dae 1e polenaes te loupe. ’t Jaor d’r nao kwóme d’r heel get kuulköpkes biej en de groep waerde flink groter.
In 2008 waas d’r geldj veur ein ech tweedehandjs prinsepak en in 2010 ware ’t de Hoeskwaker die veur ’t eers ein prinse paar oetrepe: Milie I Dingelstad & Bram I van Heur. Det waas den ouch de 1e Hoeskwakersprinses.

Aan de Boekoelse optoch waerde ouch al drék mitgedaon mit eine wage dae, mit hulp van de eljers, waerde geboewd op eine kiepper van Harry Wolters. Deze wage dae achter de trakter van Harry Ingeveldt waerde gesjpanne deej zo mit aan de Boekoelse optoch. De jaore daonao, toet 2010, waerde de gael bös geleend van de joekskepel wo ónger angere Ben Deckers aan haet mitgehólpe. Chrit Bertjens woor toen ouch al de vaste sjefeur. In 2010 höbbe ze de eerste keer in Zjwame mit getroch. Mit eine geleende wage van de kwekkerte en de eerste beerkeuning, Jacques van Melis, dae toen waas oetgerope, sjtóng biej de hoeskwakers mit oppe wage. Marco Sampers en Chrit Bertjens sjtónge aan de basis van de wage, wie d’r noe ouch nog óngeveer oet zuut. De ker die daoveur in ’t begin gebroek waerde mós echter door ’t jaor haer besjikbaar zin op ‘t veldj.  Dus élk jaor mós dae weer opnuuj op en aafgebouwd waere. In 2019 waerde eine eige wage gekoch en hoofde det neet meer. Noe waert dae al sins jaor en daag gesjtald biej Frank de Wit aan de grens. De jaore 2020 en 2021 loog de vastlaovindj door de corona zo good es oppe vót.  ’T toemalig besjtuur, Tamara Slabbers Bianca aan de Boom en Ruud van Buggenum maakde zich grote zorge euver ’t veurtbesjtaon van de Hoeskwakers. Die men wólle d’r allemaol de pin in houwe en dao waerde biej Ruud en Loes in alle haos  ein vergadering biejeingerope. Veur krege nog 7 Hoeskwakers geëntoezjasmeerd óm mit te doon, Iris Simons waerde prinses, Sjoerd van Buggenum vors en zo krege veur toch nog 7 man oppe bein, de adjes Stan en Mirte kwome oet Zjwame en zo gruijde de groep nao 9

Mit de finansieje ging ’t waal al jaore bés good. ’t Jaorllikse waofels bakke , ónger angere biej Chrit, Gordon en Tamara mer ouch de flesse aksie en ’t prins(ses) raoje brachte genóg geldj in ‘t laetje

In 2023 waerde de wage nog ‘ns gans opnuuj opgepimp in de loods van de Boumkwekerie Cox oppe Raosjtraot. Vastelaovindj 2024 troch dae veur ’t eers mit. ’t Waerde echter hoog tied det ’t klubke van de Hoeskwakers ein echte vereniging waerde. ’t Huidige besjtuur : Carla Bongaerts, Julie Kirberg, Sjoerd en Ruud van Buggenum ging nao de notaris en in ruul veur 11 nónnevótte waerde ’t op 14 mei 2025 offesjeel sjtichting De Hoeskwakers.
’t Hoeskwakerbal van 2026 waerde de nuuj pékskes die door Linda Pechthold wore gemaak geprizzenteerd. 

Es lètste eine blik in de toekoms: Sezoen 2026/ 2027 waert ’t jubelejumjaor. Den besjtaon veur 22 jaor. Linda is al drök bezig mit ’t zelf make van ós nuuj sjteke. Den zin veur weer gans in ’t nuuj gesjtaoke. Ós leje-aantal is inmiddels gegruijd nao 27 Hoeskwakers en gruijt nog sjteeds!

Det belaof get.