't Kwekkerte nuujs vanne Boekoel!

Chris I nuuje Kwekkerteprins

Geplaatst op: 12-01-2019 door Kim Vervoort

In eine boemvolle Kwekkertepool waerde aafgeloupe zaoterdig aafsjied genaome van Prins Bart I. Wie Bart door Aad-prins Juul I en besjermvrouw Tila waas opgenaome biej De Aad-prinse en de res van de aovindj allein nag mer beer moogde haole veur de res, waas ’t tied veur de nuuje!

Naodet versjillende superhelde veurbiej flitsde op de buun, bleef d’r nag mer eine euver! Prins Chris I (van Deur) waas de sjterkste en euverwon de res! Supersjnel sjtelde Chris zien adjudante Sjoerd van Deur en Dominique Clumpkens veur. Zien broor Sjoerd is zelf in 2013 prins gewaes en Dominique dae in 2017 ouch al ins adjudant waas, zólle ‘m ’t ganse sezoen de kneepkes van ’t prinssjap waal laote zeen!

Prins Chris I woont same mit zien hertje Lotte op den Camp op de Weverskamp. Ouch zien Vader en Opa zin in ’t verleje al ins Prins gewaes oppe Boekoel! Zien sente verdeent Chris biej Seacon Logistics in Venlo. Dao verzorg hae de import van goedere en containers van euver de ganse wereld nao veurnamelik Nederlandj. Meistal geit det nag good ouch! Soms vilt alles in ’t water.

Naeve ’t werk sjpeelt Chris gaer mit Lotte en op de trom biej Hermenie Amicitia Boukoul en de Prinsekepel. Ouch trap hae biej VV Boekoel taenge ein belke en waert d’r, allein mit good waer, oppe wielrenfiets getraoje. Ouch is Chris al jaore bie C.V. De Sterreflikkers! Geur weit waal, die men van dae wage waat veurig jaor té hoog, té breid, té diek en té sjiek waar….

Ziene sjpreuk veur dit sezoen haet Chris aafgeleid van ’t sjlaagwerk sjpele!

VEUR SJLAON DOOR!!

C.V. De Kwekkerte beejt ZDH Prins Chris I zien prinseresepsie aan op zónjig 24-02-2019 vanaaf 13.44 oer in de Kwekkertepool.

Gaer neudige veur uch dao allemaol veur oet! Sjlaot geur mit door?

C.V. De Kwekkerte Boekoel

 

Bedank!

Geplaatst op: 16-02-2018 door Juul

Names Prins Bart, mer zeker ouch names C.V. de Kwekkerte wille veur gaer idderein van herte bedanke waat op waat veur meneer den ouch ein biedrage haet geleverd aan deze geweldig sjoone vastelaovindj!

Idders keer op nuuj kènne veur geneete van grote getale miense die op ós aktiviteite aafkómme. De eerste Verrückte Samstag waas drök bezóch, en veur kènne uch al vertèlle det veur kómmend jaor 't program ouch al rondj is. Vanaaf de prinsebal toet en mit gister bie de aafsjloeting, kènne veur allein mer sjpraeke euver verbroedering, jónk en aad, de ganse zaal sjteit vól. Sjitterend om te zeen wie det de vastelaovindj oppe Boekoel laef! Bedank!

Veur zeen uch gaer kómmend sezoen weer truuk!

Bedank!

Sef van Buggenum ere medalie

Geplaatst op: 05-02-2018 door Kim Vervoort

Gister, tiedes de prinseresepsie van Zijne Dorstlustige Hoogheid Prins Bart I höbbe  veur de Sef van Buggenum ere-medalie oetgereik.

Ein medalie die bedoeld is veur miense die zich gedoerende ein lange periode ontzettend hel en mit väöl iefer höbbe ingezat veur de gemeinsjap en in 't bezónjer de vastelaovindj. Persone, zo wie ós erelid Sef van Buggenum waas.

Dees medalie höbbe v'r tiedes de Prinseresepsie oetgereik aan eine bezónjere miens, Ger Sanders. Ger is vanaaf 1977 lid van handjbaogvereiniging Soranus, sinds 1993 zit d'r dao in 't besjtuur, en vanaaf 1994 vervult d'r zien taak es penningmeister. Vanaaf 2009 is d'r ouch nag besjtuurslid van handjbaogbondj Gezellig Samenzijn. Mit Soranus haet d'r jaorelangk deil genaome aan de optoch, en vreuger woor d'r lid van Joekskepel Naatje Pet en later nao biej Nag Efkes, zo kump d'r al jaore lang op väöl van ós aktiviteite.

In de tied det veur oppe Boekoel nag oktoberfeeste haaje, zoot Ger dao vanaaf 1986 toet 2003 in 't besjtuur. Van 2011 toet 2014 woor d'r lid van 't kerkbesjtuur en taegeweurdig is hae nag altied vriewilliger veur de kerk.

Weer ein veurbeeld van emes dae Boekoel leef haet, laote veur trots zin op miense wie Ger.