C.V. De Kwekkerte Boekoel

't Kwekkerte nuutjs vanne Boekoel

SEF VAN BUGGENUM ERE-MEDALIE OETGEREIK AAN JOOP BECKERS & JACQUES VAN MELIS

Zónjig 23 fibberwarie, tiedes de prinseresepsie van Ziene Dórslustige Hoogheid Prins Dominique I höbbe CV De Kwekkerte Boekoel de Sef van Buggenum ere-medalie oetgereik.

Ein medalie die bedoeld is veur miense die zich gedoerende ein lange periode heel erg hel en mit väöl iefer höbbe ingezat veur de gemeinsjap en in ’t bezónjer de vastelaovindj. Persone, zo wie erelid van de Kwekkerte Sef van Buggenum waas.

Dees medalie höbbe De Kwekkerte tiedes de Prinseresepsie oetgereik aan twee bezónjere miense: Joop Beckers en Jacques van Melis. Joop is vanaaf 1978 lid van handjbaogvereiniging Soranus, wo hae tösse 1986 en 2002 ouch besjtuurslid is gewaest en in 1992-1993 de taak van waarnummend veurzitter. Vanaaf 1980 toet 1996 zoot Joop ouch in ‘t besjtuur van sjtichting Oktoberfeesten, wovan hae vanaaf 1985 toet 1996 veurzitter woor. Verder is Joop vanaaf 2011 lid van de biljaarklub BC Boekoel en is hae vanaaf 2018 bestuurslid van de Kamp. Ouch mit de vastelaovindj is Joop gènne ónbekènde, in de jaore 70 leep hae eder jaor mit in de Boekoelse optoch.
Ouch Jacques haet zien sjpaore op de Boekoelse vastelaovindj verdeent, Prins in 1984 en daonao neet allein lid van de Aad-prinse wo hae zien sjteinke haet biej gedrage veur ónger angere de Kuulköpes, mer ouch lid van c.v. de Kwekkerte tösse 1985 en 2003. Vanaaf 1973 is Jacques lid van de foetbalklub v.v. Boekoel, wo hae vanaaf 2013 erelid is en ’t lieske wat d’r neet gedaon haet kórter is den waat hae waal haet gedaon. Ónger angere jeugleider tösse 1975 en 1987, leider van Boekoel 1 tösse 1977 en 2018 (oetgezónjerd 2013-2014) en besjtuurslid tösse 1980 en 1988. Naeve de foetbalklub, is Jacques van 1973 lid van de biljaarklub B.C. Boekoel mit ’n óngerbraeking tösse 1982 en 1998. Hiej haet Jacques zitting gehad in de jubelejumkemissies veur ‘t 40 en 50 jäörig besjtaon en is hae vanaaf 2011 besjtuurslid.  

Dit zin weer twee veurbeelde van miense die Boekoel leef höbbe, laote veur greuts zin op miense wie Joop en Jacques.

Dominique I Clumpkens 7x11 Jubelejumprins 2025 biej CV De Kwekkerte Boekoel

Veurder ózze jubelejumprins 2025 waerde oetgerope höbbe veur in de Kwekkertepool eers aafsjied genaome van Prins Rochér I.

Nao zien letste prinsedans en nag einmaol ziene eige sjlager gezónge te höbbe waar ’t den toch ech tied óm aaf te traeje.

Naodet Prins Rochér I ziene kuus truuk in bewaring goof biej veurzitter Juul, waerde hae opgenaome biej de Aad-prinse die ‘m de kneepjes van ’t obere höbbe biej gebrach.

Neet veul later waerde door middel van ein sjoon filmke de zaal opgewermp en mitgenaome tiedes ’t aankleije van de nuje veurgenger wonao Jubelejumprins Dominique I oet ’t sjerm sjpróng.

Vlotjes mer georganiseerd maakte hae zelf zien 4 adjes bekènd. Chris van Deur, Dirk Vervoort, Ralph Bol en Sjoerd Jansen.

Zo flot wie meugelik waerde de waeg nao de zaal gevonje en barste ’t jubelejum sezoen los!

Wilt geur Dominique en zien vrouw Kailey mit heur adjes ein hendje kómme gaeve op de prinse resepsie den zeen veur uch gaer op 23-2-2025

Tiedes ’n super sjoon gezellig Hoeskwakerbal op vriejdig 17 jannewarie bön ich oetgerope es 18e veurgènger van de Hoeskwakers.

Veur de miense die mich neet kinne, miene naam is Stijn Crins, gebaore oppe Boekoel en 15 jaor jonk. Same mit mien pap (Roy), mam (Tamara) en broor (Bram) woon ich oppe Baove Boekoel. Dus ‘d’r geit dees daag nieks baove Boekoel’ is weer opnuuj waor.

In miene vrieje tied sjpeel ich hoorn biej hermenie Amicitia, sjpring ich geregeld oppe trampoline, laef ich mich oet tiedes freerunnen en wie ’n echte puber höb ich dök de sjlappe lach om de neuzelste dinger. Ich zit in de 3e klas van de vrieje sjool van BC Broekhin Rèmunj.

Ès klein jungkske keek ich altied op nao de Prinse, det vonj ich vet gaaf. Allein waas ich erg verlaege en durfde mich oppe legere sjool neet op te gaeve es jeugprins. Noe bön ich aajer en höb ich d’r sjiet aan.

Toes zin veur mit ’t vastelaovesvirus besjmet. Miene pap, broor en ichzelf zin adjudant gewaes. En pap zelfs eine daag prins biej de ZVV Aafkickers. Wie sjiek det ich det noe moog euvertreffe.

Toen ich heurde det ich Prins zou waere, höb ich 2 oer in de loch sjtaon sjpringe van bliedsjap en kós neet wachte toet de vastelaovindj. Ich bön toen al drek gaon dinke euver miene sjpreuk, adjes, liedje, num mer op. Ich waas der konsjtandj mit bezig en vonj ‘t heel moeijlik om miene mondj te haaje.

Miene eerste adjudant is Janna Pechtold. Ich kin heur al mien hele laeve. Vanaaf de middelbare sjool zitte we zelfs biejein in de klas. Veur höbbe altied väöl lol, doon random dinger, en rake nooit oetgekalt.

Miene tweede adjudant is miene beste vrundj, Niels van Buggenum. Ich kin alles biej hem kwiet en hae haet altied gooj advieze. Veur höbbe ouch altied väöl lol en same sjpele veur hoorn biej de hermenie.

Same höbbe veur al väöl veurpret gehad, en höbbe heel väöl zin om d’r same mit ug allemaol ein sjoon sezoen van te make.

Miene sjpreuk is:

Sjpring, träöt, lach, maak plezeer
Hoeskwakerprins bösse mer eine keer!